यवतमाळ – पुसद येथील नाईक घराण्याचे महाराष्ट्राच्या राजकारणात अनन्यसाधारण महत्व आहे. राज्यातील बदललेल्या राजकीय समीकरणानंतर मात्र यावेळी नाईक बंगल्यातच उमेदवारीसाठी रस्सीखेच बघायला मिळत आहे. त्यामुळे त्यामुळे थोरले नाईक की धाकटे नाईक? असा पेच कुटुंबात निर्माण झाल्याची चर्चा आहे.
नाईक घराणे महाराष्ट्र निमिर्तीच्या आधीपासून राजकारणात आहे. वसंतराव नाईक आणि सुधाकरराव नाईक असे दोन मुख्यमंत्री या कुटुंबाने राज्याला दिले. वसंतराव नाईक, सुधाकरराव नाईक, अविनाश नाईक, मनोहरराव नाईक, नीलय नाईक, विद्यमान आमदार इंद्रनील नाईक अशी पंरपरा सुरू आहे. शरद पवार हे काँग्रेसमधून बाहेर पडल्यानंतर सुधाकरराव नाईक त्यांच्यासोबत गेले. तेव्हापासून नाईक कुटुंबीय राष्ट्रवादी काँग्रेसमध्ये आहे. गेल्यावर्षी अजित पवार राष्ट्रवादी काँग्रेसमधून बाहेर पडल्यानंतर पुसदचे आमदार इंद्रनील नाईक हे अजित पवार गटात गेले. त्यांचे वडील मनोहरराव नाईक यांनी याबाबत कधी जाहीर भाष्य केले नसले तरी मुलासोबत तेही अजित पवार गटात असल्याचे सांगण्यात येते. मनोहराव नाईक यांचे थोरले चिरंजीव ययाती नाईक हे यवतमाळ जिल्हा परिषदेचे उपाध्यक्ष राहिले आहे. मात्र त्यांना डावलून इंद्रनील यांना आमदारकीची संधी मिळाल्यापासून ते राजकीय संधीच्या शोधात होते. राष्ट्रवादी काँग्रेस फुटल्यानंतर लहान भाऊ अजित पवार गटात गेल्याने ययाती नाईक यांनी शरद पवार यांच्याशी जवळीक वाढविली. येत्या विधानसभेसाठी राष्ट्रवादी काँग्रेस शरद पवार गटाची उमेदवारी मिळावी, म्हणून थेट शरद पवार यांच्याकडे मागणी केली. पुसदच्या नाईक बंगल्यासमोर तर शरद पवार, जयंत पाटील, सुप्रिया सुळे, रोहित पवार आदी नेत्यांचे छायाचित्र असलेले भावी आमदार ययाती नाईक असे फलकही लागले होते. हे फलक आता काढण्यात आले तरी, ययाती नाईक यांची राजकीय महत्वाकांक्षा लपून राहिलेली नाही. मात्र त्यांच्यासमोर घरातूनच बंधू इंद्रनील नाईक यांचे आव्हान आहे.
इंद्रनील नाईक हे राष्ट्रवादी काँग्रेस अजित पवार गटाकडून लढणार, हे स्पष्ट असले तरी त्यांनीही शरद पवार यांची गोपनीय भेट घेतल्याची चर्चा मतदारसंघात आहे. दुसरीकडे महाविकास आघाडीकडून राष्ट्रवादी काँग्रेस शरद पवार गटाचे ॲड. आशीष देशमुख, शरद मैंद, प्रा. शिवाजी राठोड, अनुकूल चव्हाण आदींनी उमेदवारी मागितली आहे. महायुतीत मात्र सध्यातरी आमदार इंद्रनील नाईक हेच एकमेव नाव आहे. भाजपचे माजी विधान परिषद सदस्य ॲड. नीलय नाईक हेसुद्धा उमेदवारीसाठी इच्छुक असल्याचे सांगितले जात आहे. मात्र त्यांची वसंतराव नाईक विमुक्त जाती, भटक्या जमाती विकास महामंडळाच्या अध्यक्षपदी नियुक्ती झाल्याने इंद्रनील नाईक यांच्या मार्गातील महायुतीतील स्पर्धक दूर झाला आहे.
पुसद हा बंजाराबहुल मतदारसंघ आहे. नाईक कुटुंबियांच्या वर्चस्वामुळे येथे गेल्या काही वर्षात अन्य समाजातील उमदेवार विजयी झालेला नाही. नाईक कुटुंबातील या राजकीय अस्थिरतेचा फायदा शरद पवार हे करून घेतील असे राजकीय जाणकार सांगत आहेत. त्यांनी ययाती नाईक यांना महाविकास आघाडीची उमेदवारी दिल्यास पुसदमध्ये दोन सख्खे भाऊच एकमेकांच्या विरोधात उभे राहण्याची शक्यता आहे. असे झाल्यास पुसदच्या राजकीय इतिहासात ही महत्वपूर्ण घटना ठरेल.
Post a Comment